Nókiste IT-mektep
Bıyılǵı jıldan baslap Nókis qalasında aldınǵı qánigelestirilgen mektep tiykarında informaciyalıq texnologiyalarǵa baǵdarlanǵan IT-mektep óz iskerligin baslaptı. Bul, meniń pikirimshe, jaqsı jańalıq. Mektep oqıwshılarında qansha kóp tańlaw imkaniyatı bolǵan sayın, olardıń talantların anıqlaw hám rawajlandırıw dárejesi de joqarı boladı dep oylayman. Ózim de IT tarawında islewshi qánige retinde bul jańalıqqa baylanıslı pikirlerimdi jazıp ótiwdi maqul kórdim.
IT tarawı eń tez rawajlanıp, kúnnen-kúnge quramalasıp, keńeyip baratırǵan tarawlardıń biri esaplanadı. Jasalma intellekt (artificial intelligence), mashinalıq úyreniw (machine learning), ChatGPT, OpenAI sıyaqlı terminlerdi jańalıqlarda, bálkim, kórgen, oqıǵan hám esitken shıǵarsız. Tarawdıń quramalasqanı biz tutınıwshılar ushın jaqsı, álbette, sebebi biz bul arqalı ele de sapalı ónim hám xızmetlerge iye bolamız. Biraq, sol tarawda oqıwdı, islewdi oylap júrgenler ushın qoyılatuǵın qosımsha talap — bilim hám kónlikpeleri ádettegiden tereńirek bolıwı kerek. Sol sebepli, mekteplerde, JOOda beriletuǵın fundamental bilimlerdiń áhmiyeti de artıp barmaqta.
Usı jerde jeke bir mısal keltirip ketsem. Jaqınnan berli qaraqalpaq tilin rawajlandırıwda jasalma intellekt járdeminde qanday ilajlardı ámelge asırıw múmkin degen sorawǵa juwap izlep júr edim. Bir nársege kózim jetti, jasalma intellektke baylanıslı tarawlardı úyreniw ushın, jaqsı fundamental bilimler zárúr eken, tiykarınan, matematikadan. Men mektep baǵdarlamasındaǵı pánlerdi jaman ózlestirdim dep ayta almayman, biraq universitette, bakalavr basqıshında oqıp júrip alǵan fundamental bilimlerim shala boldı. Usı waqıtqa shekemgi iskerligimde bul boslıqlardıń ornı onsha bilinbegen edi, lekin házirgi zaman hám keleshek kásiplerin ózlestiriwde bolsa usı shalalıqlar óz sózin aytıp atır.
Eger joqarıda men aytıp ótken jańadan ashılıp atırǵan IT-mektep óz aldına qoyǵan maqsetlerine erisetuǵın bolsa, bul mektep pitkeriwshileri anıq pánlerden jaqsı fundamental bilimlerge iye, informatika páninen xabarı bar, inglis tilin jaqsı dárejede ózlestirgen hám onsha quramalı bolmaǵan kompyuter baǵdarlamaların jarata alatuǵın bolıp shıǵadı.
Ata-analar, eger siziń ul-qızlarıńızdıń joqarıdaǵı pánlerge qızıǵıwshılıǵı bar bolsa, usı mektepke hújjet tapsırıw usınısın oylap kóriwińizdi másláhát etken bolar edim. Mektep atamasınan kelip shıǵıp, tek IT tarawınıń mamanı bolıwdı qálewshiler tapsıradı eken dep oylaǵanlar qátelesedi. STEM (Science, Technology, Engineering, Maths) tarawına qızıqqan qálegen oqıwshıǵa bul mektepte beriletuǵın bilimler keleshekte JOOda tabıslı oqıwına da zárúrli hám jetkilikli boladı dep oylayman.
Mektep jámáátine keleshek áwladqa bilim beriwde sharshamawına tileklespen. Mektepte baǵdarlamadan tısqarı oqıwshılarda erkinlik, ózine bolǵan isenim, juwapkershilik, óz komfort zonasınan shıǵa alıw sıyaqlı kónlikpelerdi rawajlandırıw hám kózde tutılǵan dep úmit etemen. Eger meniń bilimim, tájiriybelerim mekteptiń rawajlanıwına az bolsa da járdemi tiyetuǵın bolsa, men hámme waqıt óz imkaniyatlarımnan kelip shıǵıp, kómegimdi beriwge tayarman.