Túrkiyada oqıw

Jaqında “Amerika hawazı” (Voice of America) radiokompaniyası aǵzası Behzod Mamadievtiń Túrkiyanıń Bursa qalasınan tayarlaǵan (joqarıda berilgen) qısqa kórsetiwin kórip qalıp edim. Meniń itibarım túsken jeri, Túrkiyadaǵı joqarı oqıw orınları haqqındaǵı maǵlıwmatlar boldı. Sol jerde oqıytuǵın jerleslerdiń, sonday-aq internetten ústirtin qaraǵan maǵlıwmatlarım boyınsha, Túrkiya universitetlerinde oqıwdıń shártnama pulı semestrine $300 dan baslanadı eken hám bul men ushın kútilmegen jańalıq boldı. Men Túrkiyada oqıw ol dárejede (salıstırmalı) arzan boladı dep oylamaǵan edim.

Túrkiya, meniń pikirimshe, túrkiy (men hátte musılman degen bolar edim) dúnyadaǵı hár tárepleme rawajlanǵan el esaplanadı. Ol bazar ekonomikası, demokratiya, insan huqıqları, jeke múlk huqıqları boyınsha ádewir jetiskenliklerge erisken. Házirgi prezident Rejep Tayıp Erdoǵannıń avtoritar qılıqları, álbette, bul jetiskenliklerdi azmaz arqaǵa sheginiwge májbúr qıldı. Biraq, bul sheginiwlerdi esapqa alǵanda da, Túrkiyada biziń elge usaǵan avtoritar rejimdegi mámleketlerge salıstırǵanda erkinlikler ádewir kóp.

Ózbekstandaǵı mámleketlik joqarı oqıw orınlarında tálim alıw studentlerge jılına, shama menen, $1200-1500 ǵa túsedi eken (bul stipendiya menen, eger stipendiyasız bolsa, $600-900). Oylap qarasaq, Ózbekstanda “kontrakt”qa tólenetuǵın pul Túrkiyanıń universitetleriniń “kontrakt”ına da jetip qaladı eken (barlıq orınlarda da emes, álbette). Bul biziń jaslarımız ushın júdá hám jaqsı imkániyat dep oylayman. Eger siziń abiturient perzentlerińiz, aǵayinlerińiz, tanıslarıńız bar bolsa, bul varianttı bir oylasıp kóriwdi másláhát etken bolar edim.