Telegramda Qaraqalpaqstan bayraǵı

Waqtı-waqtı menen Telegram-kanallarda Qaraqalpaqstan bayraǵın emodziler qatarına qosıw tuwralı shaqırıqlarǵa kózim túsip turadı. Keshe de áne usınday kanallardıń birinde jáne sol xabar bolǵan eken hám ol jerde bayraǵımızdı qosıw maqsetinde, Telegramnıń usınıs betine bir tekst kiritilipti. Endi kanal avtorı sol óziniń usınısına basqalardıń dawıs beriwine shaqırıp qoyǵan eken. Sál bolsa da, progress bar, aldın Pavel Durovtıń óziniń akkauntına jazıń dep júrgenler bar edi. 😅

IT tarawınıń adamı retinde azmaz usı temaǵa túsinik berip ketiwdi maqul dep taptım. Biraq ta, qısqasha aytatuǵın bolsam, Qaraqalpaqstan bayraǵın emodziler qatarına qosıwdıń ilajı joq.

Telegramda qollanılatuǵın emodziler Telegramnıń óziniń produktı (ónimi) emes, tap sol emodzilerdi basqa messendjer yamasa social tarmaqlar hám xızmetlerde de ushıratıwıńız múmkin. Bul degeni — Telegramnıń emodzilerdi basqarıw huqıqı joq. Sol sebepli, Telegram administraciyasınan bul nárseni soraǵannıń heshqanday nátiyjesi joq.

Emodziler Unicode dep atalıwshı simvollardı kodirovkalaw standartınıń bir bólegi esaplanadı. Bul standartqa dúnya júzindegi derlik barlıq tillerdiń jazıw sistemalarındaǵı simvollar kirgizilgen. Yaǵnıy, jańa emodzilerdi qosıw ya ózgertiw, yamasa alıp taslaw sol Unicode standartında kórsetilgen qaǵıydalar boyınsha ámelge asırıladı.

Jańa emodzi qosıw usınısı betinde bayraqlar haqqında bólek bir bólim bar hám ol jerde bılay delingen:

“The Emoji Subcommittee and the UTC will no longer accept proposals for flags. Flags for countries with Unicode region codes are automatically added, with no proposals necessary.”

Awdarması: “Emodzi járdemshi komiteti hám Unicode texnikalıq komiteti endigiden bılay bayraqlar ushın usınıslardı qabıllamaydı. Unicode aymaq kodına iye mámleketler (yaǵnıy, ǵárezsiz mámleketler; bul Qaraqalpaqstanǵa tiyisli emes) avtomat túrde qosıladı, oǵan usınıs talap etilmeydi”.

Kórip turǵanıńızday, anıq qaǵıydalar kórsetilgen. Bir-eki paydalanıwshıǵa sonday qaǵıydaları bar desem, “sonda da, kóre bereyik-te” dey beredi, orıslardıń “на авось” degenindey (tap qaramay turǵanda, usınısı ótip ketetuǵınday). 😅

Doslar, joqarıdaǵılardı esapqa alǵan halda, bul nátiyjesiz háreketlerdi toqtatayıq. Qaraqalpaqstan bayraǵın bólek stiker túrinde jaratsańız boladı da, lekin emodziler qatarına qosıwdıń házirgi kúnde ilajı joq.