Konstituciya
Qaraqalpaqstan Respublikası Konstituciyasınıń qalay isle(me)wi haqqında eki mısal:
1-mısal.
80-statya. Qaraqalpaqstan Respublikası Joqarǵı Keńesiniń Baslıǵı Qaraqalpaqstan Respublikasınıń eń joqarı lawazımlı adamı bolıp tabıladı.
Qaraqalpaqstan Respublikası Joqarǵı Keńesiniń Baslıǵı Qaraqalpaqstan Respublikasınıń Joqarǵı Keńesi tárepinen Qaraqalpaqstan Respublikası Joqarǵı Keńesiniń deputatlarınıń arasınan jasırın dawıs beriw jolı menen Qaraqalpaqstan Respublikası Joqarǵı Keńesiniń wákilligi múddetine hám qatarına eki múddetten asırılmastan saylanadı.
Aldınǵı Joqarı Keńestiń baslıǵı 18 jıl dawamında “taxtta” otırdı. Eger joqarıdaǵı 80-statyaǵa qaraytuǵın bolsaq, onıń usı lawazımda otırıw múddeti bes jıldan eki múddet, yaǵnıy — on jıldan aspawı kerek edi.
“Sheklep ne qılamız”. Durıs, 80-statyadan “qatarına eki múddetten asırılmastan” degen jerin alıp taslaymız. Konstituciyanıń sońǵı redakciyasında bul sózler álleqashan alıp taslanǵan. Aldınıraq mısal etip keltirilgen 80-statya Qaraqalpaqstan Respublikası Konstituciyasınıń ózgeris kirgizilmesinen áwelgi redakciyasınan alınǵan edi.
2-mısal.
83-statya. …Qaraqalpaqstan Respublikası Joqarǵı Keńesiniń Baslıǵı óz wákilligin jekke arzası boyınsha, sonday-aq Qaraqalpaqstan Respublikası Joqarǵı Keńesi dúzgen Mámleketlik medicinalıq komissiyasınıń juwmaǵı menen tastıyıqlanǵan den sawlıǵınıń jaǵdayı boyınsha óz minnetlerin orınlay almasa, toqtatıwı múmkin. … Bunday jaǵdaylarda 10 kún ishinde Qaraqalpaqstan Respublikası Joqarǵı Keńesiniń jańa Baslıǵın saylaw ótkeriledi.
Konstituciya boyınsha, Qarqalpaqstan Respublikasınıń jańa Baslıǵın saylawǵa 10 kún múddet berilgen. Bizler ne qılamız: dáslep, qosımsha Joqarǵı Keńes deputatlıǵına “saylaw” ótkizemiz. Sol deputatlar qatarǵa qosılǵanınan keyin barıp, Joqarǵı Keńes Baslıǵı lawazımı ushın jáne basqa “jasırın saylaw” ótkizemiz.
Oǵan shekem 2 ay ótip ketse ne boladı? — hesh nárse bolmas, keyinirek joqarıdaǵı sol “on kún”di “eki ay”ǵa ózgertip, tuwrılap qoyarmız-da…
…Bunday jaǵdaylarda eki ay múddet ishinde Qaraqalpaqstan Respublikası Joqarǵı Keńesiniń jańa Baslıǵın saylaw ótkeriledi.
Konstituciya ayaq astı bolǵan jerde onı bayramlaw qalay boldı?..