Til haqqında

Jaqınlap kiyatırǵan til bayramı múnásibeti menen, social tarmaqlardıń belsendi blogerleri tayarlıqların álleqashan baslap jibergen usaydı. Bul, álbette, jaqsı. Sebebi, qaraqalpaq tilin saqlap qalıw ápiwayı xalqımızdıń ǵana qolında, al húkimettiń is-háreketlerine, biypárwalıǵına qaraǵanda, endigiden bılay olardan derlik heshqanday úmit joq.

Tilge baylanıslı hár qıylı konkurs hám jarıslardı shólkemlestirgen maqul, biraq ta qáleseńiz, men sizlerge onnan da paydalıraq chellendjdi usınıs etemen. 😉

Eger tildiń rawajlanıwına úles qosaman degen niyetińiz bolsa, tómendegilerdi ámelge asırsańız boladı:

• ózińiz súyip oqıytuǵın kitaplarıńız bar bolsa, olardı elektronlastırıwǵa úlesińizdi qosıń hám keyinshelli bul kitaplardı kitapxana.com yamasa basqa da soǵan usas saytlarǵa jaylastırıw imkanı payda boladı;

• joqarıdaǵı jaǵdayǵa usas, eger audio kitaplardı unatsańız, onda sol súyikli kitaplarıńızdı óz dawısıńız benen oqıp, audio kórinisine keltirip, basqalarǵa esitiw imkaniyatın jaratsańız boladı (bul kózi ázzi adamlarǵa da úlken járdem boladı dep oylayman);

• eger qandayda bir tarawdıń mamanı bolsańız, bilimińiz hám tájiriybeńizdi basqalar menen bólisiwdi qáleseńiz, maqalalar jazıń hám Qaraqalpaq Wikipediyasına qosıń yamasa arnawlı blog/Telegram-kanal ashıp, onı júrgiziń;

• eger shet tillerin bilseńiz, onda sırt elliler ushın qaraqalpaq tilin úyretetuǵın hár qıylı resurslar tayarlań. Mısalı, ápiwayı razgovornik.

Bul sanap ótkenlerim tek meniń yadıma kelgen birneshe variantlar ǵana edi. Anıq isenim bildirip ayta alaman, basqalarda bunnan da kóbirek ideyalar bar bolıwı múmkin. Tilimiz rawajlansın deseńiz, ózińiz hám úlesińizdi qosıń.